Dossier do Tema 5: O deseño curricular

Nesta primeira entrada falarei sobre as tarefas realizadas na aula durante as sesións do Tema 5: O deseño curricular, impartido polo profesor Gonzalo Constenla.

O 12 de novembro foi a sesión de introdución da materia, pero deunos tempo a comezar o Tema 5 e a facer a primeira tarefa da materia. Tratábase dunha tarefa colaborativa para traballar en grupos de 5 e responder a unha serie de preguntas sobre o currículo: Que é o currículo? Cales son os elementos do currículo? Cales son as competencias básicas que recolle o currículo? Cales son os graos de concreción curricular? Tras un breve debate nos grupos, puxemos en común as nosas respostas con toda a clase e o profesor. Esta actividade serviu para refrescar coñecementos previos doutras materias, ver as nosas carencias e que o profesor fixese unha avaliación inicial dos nosos coñecementos. Foi unha actividade sinxela que non presentou dificultades e o maior logro foi quizais cuestionar a veracidade dos coñecementos previos o asimilar novos coñecementos. Pareceume unha actividade moi amena e útil para iniciar o tema.

O 19 de novembro foi a primeira sesión que adicamos íntegramente ao tema. Nada máis empezar a sesión, realizarmos a primeira actividade coa aplicación Kahoot. Fixemos a actividade por parellas ou pequenos grupos. Logo de rexistrarnos na aplicación, fomos respondendo a 24 preguntas sobre a distribución competencial en relación a diferentes aspectos do currículo, seleccionando entre 4 respostas posibles. Por exemplo: “Quen establece os contidos das materias troncais?”. Mentras, o profesor ía explicando ou puntualizando as respostas. Con esta actividade aprendín e reflexionei sobre as funcións dos diferentes actores (goberno central, autonómico, ministerio, centros) no deseño do currículo segundo a Lei, aprendín a utilidade da aplicación Kahoot e aprendín que se pode aprender xogando e errando, sempre que o profesor dea un feedback apropiado. A principal dificuldade foi atopar a resposta correcta, atendendo ao verbo e aos elementos mencionados na pregunta. O principal logro foi aprender sobre a marcha e usar Kahoot por primeira vez. Pareceume unha actividade de motivación perfecta para tratar un tema que non era moi atractivo (a Lei), ao mesmo tempo que serviu de avaliación inicial dos nosos coñecementos previos. Na segunda parte da sesión, realizamos unha actividade colaborativa sobre as linguas estranxeiras no currículo da ESO, Bacharelato e FP. O profesor fixo grupos de 3 persoas e asignounos apartados dun documento de Word compartido en Google Drive. Dentro do grupo, dividímonos os apartados e buscamos a información requerida utilizando o texto da LOMCE e do Decreto galego, posto que nos tocou o tema do Bacharelato. O profesor ía monitorizando o avance da actividade facendo comentarios de avaliación formativa cando vía que nos desviabamos do resultado buscado. Ao final, os distintos grupos presentaron a súa contribución ao documento final e o profesor ía puntualizando, ampliando ou facendo preguntas críticas sobre a información. Nesta actividade adquirín coñecementos sobre as linguas estranxeiras na ESO, Bacharelato e FP, tanto sobre o tema do meu grupo como dos outros grupos, a desenvolvín un pouco máis a miña competencia dixital. A maior dificultade foi atopar a información requerida, xa que ás veces certa información das leis é un pouco difícil de localizar. Na miña opinión, esta actividade de aprendizaxe colaborativa é un xeito perfecto de aprender a traballar en equipo, desenvolver competencias e compilar coñecementos sobre un tema moi denso de forma amena.

O día 26 de novembro rematamos o tema falando da Escola Oficial de Idiomas, un tema no que o docente é especialista, por ser o director da EOI de Santiago. Comezamos a sesión cun Kahoot individual sobre a distribución competencial do currículo, pero esta vez da EOI. Con esta actividade, o profesor puido facer unha avaliación inicial do noso coñecemento e aproveitou para explicar cuestións interesantes: por exemplo, na pregunta “Quen administra e avalía as probas e certifica os niveis A1-C2?”, Gonzalo explicou que os profesores da EOI mandan exemplos de tarefas para o exame de certificación a unha comisión, e as tarefas seleccionadas sométense despois a unha serie de mecanismos de pilotaxe (probas con alumnos reais para avaliar a súa adecuación) e estandarización (de criterios de avaliación) para que as probas sexan fiables. Ao final do Kahoot, fixemos unha valoración xeral da actividade, que supón unha avaliación da práctica docente, recollida nos requisitos do currículo. Coas estadísticas tamén podemos avaliar a actividade en si: se nos resultados vemos que todos os alumnos erraron na mesma pregunta, significa que probablemente esa pregunte estea mal formulada. Con esta actividade, aprendín todo o anterior (e máis) e, como xa dixen, creo que é unha forma perfecta para motivar ao alumnado ao principio dunha clase, aínda que a gamificación tamén son consciente de pode dar lugar á desconcentración do alumnado se non se xestiona ben.

Como conclusión, creo que as actividades deste tema foron moi acertadas e conseguiron que, gracias á implicación activa do alumnado no proceso de ensino-aprendizaxe, aprendéramos case sen decatarnos.